Hamilə qadınlar daha çox hansı nutrientlərdən istifadə etməlidir?

Hamiləlik dövründə sağlam qidalanma əsas şərtlərdən sayılır. Bunun üçün qəbul edilən hər bir qidaya onun tərkibindəki maddələrə uyğun olaraq diqqət yetirmək lazımdır. Çünki hamiləlik dövrü üçün faydalı və zərərli qidalar mövcuddur. Bəzi vitaminlər və minerallar hamiləlik zamanı çox vacibdir. Bətndə olan körpənin böyüməsi və inkişafı üçün düzgün qidalar qəbul etmək lazımdır.

Hamiləlik dövründə əməl olunması vacib qaydalardan biri düzgün qidalanmadır. Yaxşı qidalanma hamiləlik müddətində vücuddakı əlavə tələblərin öhdəsindən gəlməyə kömək edir. Məqsəd isə dölün böyüməsini dəstəkləmək və sağlam çəki saxlamaq üçün kifayət qədər qida qəbulunu balanslaşdırmaqdır.

Hamiləlikdə sağlam həyat tərzi və pəhriz lazım olan vitamin və mineralların çoxunu almağa kömək edir. Tibbdə sübut olunan tövsiyələrdən biri də hamiləlik dövründə fol turşusu qəbul etməyin vacibliyidir.

Vitaminlər və minerallar bədənin bütün funksiyalarında mühüm rol oynayır. Sağlam qidalar yemək və hər gün tərkibində vitamin və minerallar nutrientlər qəbul etmək hamiləlik zamanı zəruridir.

Hamiləlik zamanı fol turşusu, dəmir, kalsium, D vitamini, xolin, omeqa-3 yağ turşuları, B vitaminləri və C vitamini lazımdır.

Hər gün hamiləliyin 12 həftəsinə qədər 400 mikroqram fol turşusu qəbul etmək tövsiyə olunur. Bu, hamiləliyin ilk həftələrində körpənin inkişafında problem riskini azaltmaq üçündür.

Eyni zamanda, gündəlik D vitamini əlavəsi qəbul etmək də zəruridir. Bu dövrdə A vitamini (retinol) olan hər hansı qida əlavəsi qəbul etmək isə tövsiyə olunmur. Çünki həddindən artıq A vitamini körpəyə zərər verə bilər.

Fol turşusu sinir borusu qüsurları kimi tanınan doğuş qüsurlarının qarşısını almağa kömək edir. Əslində, fol turşusunun qəbuluna hamilə qalmadan əvvəlki dövrdə başlamaq lazımdır. Amma buna həmin dövrdə riayət etməyənlər hamiləlik müddətində başlamalıdır.

Odur ki, tərkibində fol turşusu (fol turşusunun təbii forması) olan yaşıl yarpaqlı tərəvəzlər və fol turşusu əlavə edilmiş qidalara üstünlük verilməsi zəruridir. Sağlam hamiləlik üçün tövsiyə olunan folat miqdarını təkcə qidadan əldə etmək çətindir, ona görə də fol turşusu əlavəsi qəbul etmək vacibdir.

Hamilələr üçün hər gün 10 mikroqram D vitamini lazımdır. Hamilə və süd verən qadınlara sentyabr-mart ayları arasında bu miqdarı ehtiva edən gündəlik əlavə qəbul etmək tövsiyə olunur. Çünki sentyabr və mart ayları arasında bədən yalnız günəş işığından kifayət qədər D vitamini istehsal edə bilmir, buna görə də əlavələr tövsiyə olunur.

D vitamini bədəndə sümüklərin, dişlərin və əzələlərin sağlam olması üçün lazım olan kalsium və fosfat miqdarını tənzimləyir.

D vitamini bəzi qidalarda da var, o cümlədən:

• yağlı balıq (somon, skumbriya, siyənək və sardina kimi)
• yumurta
• qırmızı ət

D vitamini təbii olaraq meydana gələn və ya əlavə edilən az sayda qidada olduğu üçün, yalnız qidalardan kifayət qədər almaq çətindir.

Eyni zamanda hamiləlikdə dəmir və C vitamini qəbul etmək də həm ananın, həm də körpənin sağlamlığı üçün önəmlidir. Çünki hamiləlikdə dəmir çatışmazlığı bir çox problemləırə gətirib çıxara bilər.

Vitamin C hüceyrələri qoruyur və onları sağlam saxlamağa kömək edir. O, müxtəlif meyvə və tərəvəzlərdə olur və balanslaşdırılmış pəhriz sizə lazım olan bütün C vitaminini təmin edə bilər.

Tərkibində vitamin C olan yaxşı mənbələrə aşağıdakılar daxildir:

• portağal və portağal suyu
• qırmızı və yaşıl bibər
• çiyələk
• qara qarağat
• brokoli
• brüssel kələmi
• kartof

Hamiləlikdə kalsium çox önəmlidir. Kalsium körpənizin sümükləri və dişləri üçün çox vacibdir.

Kalsium mənbələrinə aşağıdakılar daxildir:

• süd, pendir və qatıq
• yaşıl yarpaqlı tərəvəzlər
• kalsium əlavə edilmiş içkilər
• çörək və zənginləşdirilmiş undan hazırlanmış hər hansı qidalar
• sümükləri də yeyilən balıqlar

Hamiləlik zamanı əsas vitaminlər və minerallar